I Encontro Interxeracional Regueifeiro

A Asociación Oral ten o pracer de anunciar un acto histórico que terá lugar na emblemática Casa de Rosalía de Castro en Padrón. Máis de 40 improvisadoras/es de todas as idades e puntos da Galiza xuntaranse neste lugar cargado de historia para celebrar unha asemblea anual e o primeiro Encontro Interxeracional Regueifeiro.
O vindeiro sábado 3 de febreiro, ás 11:00 horas o presidente da Fundación Rosalía de Castro, Anxo Angueira, daralle a benvida ás persoas participantes.
A asemblea inaugural terá lugar ás 13.00 horas no salón de actos da Casa de Rosalía De Castro, conducida polo presidente de ORAL Carlos Alonso.
Será este un momento para compartir experiencias, coñecementos e paixón pola regueifa, unha forma singular de improvisación oral en verso que perdura no tempo con moita xera.
O prato forte da xornada será o encontro de improvisación, que comezará ás 16:00 horas no mítico bar Casa Manolo. Este espazo acollerá improvisadoras/es de todas as idades, creando un ambiente único de intercambio cultural, emocional e xeracional.
Este evento supón unha oportunidade única para unir ás persoas amantes da improvisación oral. A Casa de Rosalía De Castro, berce da inspiración poética, será testemuña da creatividade e habilidade das persoas participantes, convertendo esta xornada nunha experiencia inesquecible.