Skip to Content

Dende a Asociación ORAL da Galiza creamos este sitio coa intención de abrir unha ventá, a través da internet, a todas as persoas interesadas nesta vertente da improvisación oral rimada.

A regueifa é a manifestación máis estendida no noso país da secular arte popular da improvisación oral en verso, da que se atopan referencias dende a Antiga Grecia, pasando polo Imperio Romano e a Idade Media, ata chegar aos nosos días.

Pero non só falaremos da súa orixe, da súa técnica, de como aprendela, practicala ou simplemente gozala; pois tamén repararemos noutras manifestacións tan antigas como a mesma regueifa ou mesmo tan modernas como o rap, para, deste xeito, recoñecer como se poden relacionar.

Ademais será a ágora onde falar destas disciplinas e poderá servir de lugar de contacto entre @s regueifeir@s e o seu público.Tentarase, asemade, que sirva para estar informad@ da actividade da regueifa e da Asociación para que tod@s saiban onde e cando acudir a unha porfía, a un obradoiro ou un xantar regueifeiro.Tamén valerá para abrir un espazo no que se poida regueifar en liña en tempo real, ver actuacións e escoitar regueifas dende calquera parte do mundo.

Por último, pero non menos importante, ten o obxectivo de achegar e recompilar información e documentación sobre esta arte poética, para, deste xeito, ir enchendo o oco que hai no tocante ao estudo formal e profundo que a regueifa e o resto de formas de improvisación oral merecen dentro do marco da nosa cultura popular e tradicional.

Para abrir boca vexamos un documentario editado pola ORAL no ano 2009, onde o presidente Carlos Alonso fai un repaso polas orixes da Asociación, os proxectos que tiñan entre mans daquela e os futuros. No vídeo podemos ver imaxes dos primeiros anos (ano 98), con regueifeiros xa finados como Costa de Xaviña ou Calviño de Tallo. Tamén combina imaxes doutras actuacións de principios de século XXI onde podemos ver os novísimos Pinto d´Herbón, Luís O Caruncho, Bieito Lobariñas e Josinho da Teixeira.

Páxina de Facebook da Asociación ORAL de Galicia: